Síðasti leikur 12. umferðar Olísdeildar karla verður í Eyjum í dag, klukkan 13:30 þegar heimamenn taka á móti neðsta liði deildarinnar, HK. ÍBV er sem stendur í 5. sæti deildarinnar með 12 stig eftir 10 leiki en HK er í 8. og neðsta sæti með 3 stig eftir 11 leiki. Segja má að nýtt tímabil hefjist nú í deildinni eftir tæplega tveggja mánaða hlé vegna Evrópumóts landsliða í Danmörku í janúar. �?ll liðin hafa reynt að styrkja leik sinn og jafnvel leikmannahóp sinn fyrir lokasprettinn en deildin hefur sjaldan verið jafnari en í ár. Vinni ÍBV í dag og leikinn sem liðið á inni gegn Akureyri á heimavelli, er ÍBV aðeins stigi á eftir Haukum, sem eru á toppnum og þykja vera í sérflokki. Haukar eru efstir með 19 stig, þá kemur Fram með 14, FH og Valur með 13 stig, ÍBV með 12, ÍR er í 6. sæti með 10, Akureyri í 7. sæti með 9 stig og eins og áður sagði, er HK í neðsta sæti með 3 stig. Eins og sjá má er keppnin hörð og lítið sem má út af bregða.

Eyjamenn hafa breytt leikmannahópi sínum aðeins, sendu erlendu leikmennina heim en fengu þeirra í stað einn norskan markvörð og verður fróðlegt að sjá hvort hann færi liðinu meira jafnvægi í markvörsluna en verið hefur. �?á endurheimtir liðið Róbert Hostert úr meiðslum en hann hefur verið lengi frá keppni.