ÍBV tók á móti FH í dag í síðustu umferð Olísdeildar kvenna. ÍBV þurfti á sigri að halda til að halda þriðja sætinu en Fram hefði getað skotist upp fyrir ÍBV ef Safamýrarliðið myndi vinna Hauka og ÍBV tapa fyrir FH. ÍBV dugði í raun og veru bara eitt stig en að sjálfsögðu var stefnan sett á sigur. Og sigur hafðist að lokum en FH veitti ÍBV harða mótspyrnu og voru inni í leiknum allt þar til um tíu mínútur voru eftir, að stelpurnar fundu loks taktinn og tryggðu sér sigurinn. Lokatölur urðu 24:21 en ÍBV náði mest sex marka forystu, 23:18 þegar skammt var til leiksloka.

Leikurinn fór rólega af stað, reyndar mjög rólega því þegar fimmtán mínútur voru búnar, var staðan 3:1 fyrir ÍBV. Sóknarleikur beggja liða var arfaslakur en að sama skapi var varnarleikurinn góður. Eyjaliðið átti reyndar í erfiðleikum fyrstu 50 mínútur leiksins að finna glufur á vörn FH-inga en lengst af munaði einu til þremur mörkum á liðunum og staðan í hálfleik var 11:8 ÍBV í vil. FH liðið náði svo að jafna metin í byrjun síðari hálfleiks og var jafnt framan af en í stöðunni 17:17 brustu flóðgáttirnar, ÍBV skoraði sjö mörk gegn engu marki FH og tryggði sér sigurinn dýrmæta.

Nú liggur fyrir að ÍBV mætir FH annað árið í röð í 8-liða úrslitum. Í fyrra var Jón Gunnlaugur Viggósson, annar tveggja þjálfara ÍBV einmitt hinu megin við borðið, stýrði FH en hann segist spenntur fyrir komandi rimmu í myndbandsviðtali sem fylgir fréttinni.