Karlalið ÍBV í knattspyrnu leikur fyrsta leik sumarsins í dag. Liðið sækir Fram heim í Laugardalinn en leikurinn fer reyndar ekki fram á þjóðarleikvanginum, heldur á gervigrasinu í Laugardal þar sem Laugardalsvöllur sjálfur er langt frá því að vera leikfær. Eins og svo oft áður er Eyjaliðið spurningamerki. Sigurður Ragnar Eyjólfsson, þjálfari ÍBV stýrir í fyrsta sinn félagsliði eftir sjö ára þjálfaraferil með íslenska kvennalandsliðið þar sem Sigurður Ragnar náði frábærum árangri með liðið. Nokkrar breytingar hafa orðið á ÍBV og sterkir leikmenn eins og David James, Hermann Hreiðarsson og Tonny Mawejje hafa horfið á braut en ÍBV hefur tryggt sér leikmenn eins og Abel Dhaira, Jökul I Elísabetarson, Jonathan Ricardo Glenn og Dominic Khori Adams. Fyrir utan markmannsskipti, þá er varnarlínan nánast óbreytt frá því í fyrra. Varnarleikurinn verður því sterkur en sem fyrr er spurning hvernig reiðir af í sóknarleiknum. Flestir fjölmiðlar spá ÍBV um miðja deild, 6. sætið er vinsælt í spá þeirra en ÍBV var einmitt í því sæti í árlegri spá forráðamanna deildarinnar sem birt var í síðustu viku. Fram er spáð á svipuðum slóðum, þannig að leikurinn í dag verður vafalaust erfiður.

Í það minnsta tveir leikmenn leika ekki með ÍBV í dag og báðir eru þeir varnarmenn. Matt Garner, vinstri bakvörður tekur út leikbann í fyrsta leiknum og Arnór Eyvar �?lafsson, hægri bakvörður er meiddur. �?á er óvíst með þátttöku Abel Dhaira en Eyjamenn tefla fram tveimur sterkum markvörðum í ár og líklegt er talið að Guðjón Orri Sigurjónsson muni byrja í markinu í dag.

Leikur ÍBV og Fram verður í beinni útsendingu á Stöð 2 sport og verður leikurinn sýndur á breiðtjaldi á Háaloftinu. Leikurinn hefst klukkan 16:00 og er annar tveggja opnunarleikja Íslandsmótsins.