Styrmir Sigurðarson, sjúkraflutningamaður í Vestmannaeyjum hefur verið ráðinn í stöðu yfirmanns sjúkraflutninga við Heilbrigðisstofnun Suðurlands frá 1. maí 2015. Hann var valinn úr hópi átta umsækjenda og uppfyllir mjög vel menntunar- og hæfniskröfur sem settar voru fram fyrir starfið. Styrmir er fæddur árið 1969.

Styrmir hefur lokið námi sem bráðatæknir og slökkviliðsmaður 1.,2. og 3. frá Brunamálaskólanum 2001, neyðarflutningsnámi frá Sjúkraflutningaskólanum 2001 auk grunnnáms sjúkraflutninga frá Sjúkraflutningaskólanum 2001. Til viðbótar hefur Styrmir öðlast kennsluréttindi í Advanced Life Support og reykköfunar, hann hefur sótt sér endurmenntun á sviði bráðameðferða. Auk þess hefur Styrmir sótt sér menntun á sviði gæðavottunarferla, hópeflis og teymisvinnu fyrir vinnustaði. Styrmir hefur einnig yfirgripsmikla reynslu sem kennari á sviði neyðarflutninga og endurlífgunar. Styrmir hefur verið umsjónarmaður grunn- og neyðarflutninganámskeiða á vegum Sjúkraflutningaskólans, verið leiðbeinandi á endurlífgunarnámskeiðum á vegum ERC, Sjúkrahúss Akureyrar fyrir heilbrigðisstofnanir auk annarrar kennslu. Styrmir hefur fjölbreyttan starfsferil að baki og hefur tekið að sér ýmiskonar verkefni þar sem krafist er hæfileika til stjórnunar og góðs skilnings á rekstri. Styrmir mun áfram starfa og búa í Vestmannaeyjum.

Af HSU.is