Eyjamenn féllu í kvöld úr leik í bikarkeppninni en liðið sótti úrvalsdeildarlið Fjölnis heim í Grafarvoginn. Fjölnir hefur komið flestum á óvart með góðu gengi á fyrsta ári sínu í efstu deild en liðið er í fimmta sæti deildarinnar og vann m.a. topplið Keflavíkur í síðustu umferð. Eyjamenn voru síst lakara liðið í kvöld en ÍBV komst yfir strax á tíundu mínútu. ÍBV lék svo einum leikmanni færri allan seinni hálfleikinn þar sem Ingi Rafn Ingibergsson fékk að líta rauða spjaldið, annan leikinn í röð en Ingi Rafn tók út leikbann í deildarleiknum gegn Njarðvík. Fjölnir jafnaði metin á 79. mínútu og skoraði svo sigurmarkið í framlengingu.