- Eyjafréttir
- ·
- Fréttir
- ·
ÍBV endar í 4. sætinu | Mætir Gróttu í 8-liða úrslitum
ÍBV tryggði sér í gær heimaleikjarétt í 8-liða úrslitum Íslandsmóts karla eftir jafntefli á einum erfiðasta útivelli landsins í Mosfellsbæ. Jafnt var í hálfleik 15:15 en leiknum sjálfum lauk 28:28.
Með sigri hefði ÍBV tekið sæti Aftureldingar í 3. sætinu og mætt FH-ingum í 8-liða úrslitum en í staðinn mætir liðið Gróttu sem endaði í fimmta sætinu. Hefði ÍBV tapað leiknum myndi liðið spila við Aftureldingu í 8-liða úrslitunum og hefja einvígið á útivelli.
Vörn ÍBV var ekki til staðar í fyrri hálfleik og var markvarslan að sama skapi engin. Í síðari hálfleik birti þó yfir leiknum þrátt fyrir slaka byrjun. ÍBV hafði tveggja marka forystu þegar stutt var eftir en náði þó ekki að halda út.
Theodór Sigurbjörnsson var markahæstur í liði ÍBV með tíu mörk en á eftir honum kom Kári Kristján Kristjánsson með fimm og þeir Andri Heimir Friðriksson og Agnar Smári Jónsson með fjögur. Stephen Nielsen varði tólf skot, tíu þeirra í seinni hálfleik en Kolbeinn Aron Arnarson varði fjögur.
