Dýpkunarframkvæmdir í Landeyjahöfn ganga vonum framar, samkvæmt upplýsingum sem bæjarstjóri kynnti á fundi bæjarráðs Vestmannaeyja sl. þriðjudag. Þar kom fram að dýpi í hafnarmynninu hefði aukist úr um 3,7 metrum í 6–7 metra á nokkrum dögum.

Dýpkunarskip Jan De Nul hóf vinnu að einhverju marki föstudaginn 2. október. Skipið vann í um sex klukkustundir um kvöldið og beitti svokallaðri jetting-aðferð, þar sem sjó er dælt niður í sjávarbotninn til að losa sand og færa hann frá hafnarmynninu.

Breyttu aðferð við dýpkunina

Önnur lægð gekk yfir svæðið aðfaranótt sunnudags. Við mælingu þann dag var dýpið í hafnarmynninu um 4,1 metri og hófst vinna að nýju klukkan 20 um kvöldið. Að morgni mánudags hafði dýpið aukist í um fimm metra.

Á mánudagsmorgni var hætt að beita jetting-aðferðinni og farið yfir í hefðbundnari dýpkun. Ástæðan var sú að straumurinn framan við höfnina reyndist ekki nægilega sterkur til að flytja efnið frá svæðinu.

Á fundardegi var skipið að vinna á svokölluðum buffer-svæðum með það að markmiði að draga úr því hversu hratt sandur safnast fyrir framan hafnarmynnið.

Öflugri búnaður skiptir máli

Í fundargerðinni kemur fram að afköst skipsins séu margfalt meiri en þeirra aðila sem áður hafi sinnt dýpkuninni. Staðan væri því mun erfiðari ef nýr dýpkunaraðili væri ekki kominn með skip staðsett í Vestmannaeyjum, aukinn búnað og meiri afkastagetu.

Bæjarráð telur byrjunina lofa góðu og bindur góðar vonir við framhaldið. Ráðið leggur áherslu á að allt verði gert svo hægt sé að sigla í Landeyjahöfn, enda séu siglingar þangað gríðarlega mikilvægar fyrir samfélagið.