Ísfélagið hagnaðist um 1,4 milljónir dala eða um 200 milljónir króna á öðrum ársfjórðungi. Þetta kemur fram í uppgjöri félagsins sem birt var í dag.

Hagnaður Ísfélagsins á fyrstu sex mánuðum ársins nam 280 þúsund dölum eða tæpar 39 milljónir króna, en tap varð af rekstrinum á fyrsta ársfjórðungi. Til samanburðar hagnaðist félagið um 17,9 milljónir dala eða um 2,5 milljarða króna á fyrri árshelmingi 2023.

Þegar helstu niðurstöður úr rekstrarreikningi tímabilsins eru færðar yfir í íslenskar krónur á meðalgengi fyrstu 6 mánuði ársins 2024 (138,24) voru rekstrartekjur félagsins 9,4 milljarðar króna, rekstrarhagnaður 815,6 milljónir króna, hagnaður eftir skatta 38,7 milljónir króna og EBITDA 1,83 milljarðar króna.

Sé staða á efnahag félagsins þann 30.6.24, færð í íslenskar krónur á lokagengi tímabilsins (139,09), eru heildareignir 106,4 milljarðar króna, fastafjármunir 92,6 milljarðar króna og veltufjármunir 13,7 milljarðar króna. Eigið fé í lok annars ársfjórðungs 2024 var 74,5 milljarðar króna og skuldir og skuldbindingar 31,9 milljarðar króna.

Haft er eftir Stefáni Friðrikssyni forstjóra Ísféalgsins í tilkynningu að  í lok júlí hafi Sigurbjörg, nýr togari félagsins komið til landsins og er verið að búa hann til veiða. Þá segir hann að bundnar séu miklar vonir við að skipið verði fengsælt og beri að landi úrvals hráefni.

„Það fylgir útgerð nýs skips að eldri skip hverfa úr rekstri og því hefur togaranum Ottó N. Þorlákssyni verið lagt og til stendur að hætta útgerð Jóns á Hofi í haust.

Eftir þessar breytingar munu frystitogarinn Sólberg og Sigurbjörg veiða bróðurpartinn af bolfiskkvóta félagsins en auk þeirra gerir félagið út krókabátinn Litlanes.

Í vor var tekin ákvörðun um að hætta fiskvinnslu félagins í Þorlákshöfn og verður henni lokað í september. Ástæðurnar eru, eins og áður hefur komið fram, annars vegar að félagið hefur ekki nægar aflaheimildir til þess að vera með bolfiskvinnslu á þremur stöðum og hins vegar aflabrestur í humarveiðum.

Annar ársfjórðungur er yfirleitt sá ársfjórðungur þegar umsvifin eru hvað minnst í rekstrinum og þá er tíminn notaður til að sinna nauðsynlegu viðhaldi um borð í skipum og í landi.

Birgðir félagsins minnkuðu á tímabilinu og verð á mörkuðum hefur almennt verið ágætt.

Heildarafli skipa félagsins á fyrri helmingi ársins var 25.900 tonn samanborið við tæp 81.200 tonn á sama tímabili í fyrra og framleiddar afurðir voru 14.700 tonn samanborið við 31.300 tonn í fyrra.

Í júní komu fram tillögur Hafrannsóknastofnunar um kvóta fyrir næsta ár í flestum nytjastofnunum. Það voru vonbrigði að sjá ekki tillögur um meiri aukningu í þorskkvótanum og ég verð að viðurkenna að minni úthlutun í íslensku síldinni kom mér mjög á óvart.

Ég vil því nota þetta tækifæri og benda enn og aftur á brýna nauðsyn þess að auka hafrannsóknir. Þannig bætum við þekkingu okkar á lífríkinu í hafinu og minnkum þar með óvissuna um afrakstursgetu nytjastofnanna. Minni óvissa leiðir til þess að unnt er að taka betri og nákvæmari ákvarðanir um sjálfbærar veiðar úr fiskistofnunum.“

segir Stefán Friðriksson.