Alþingi samþykkti í gær fjárlög fyrir árið 2025. Heildarframlög til samgöngumála nema rúmum 62 milljörðum kr. og hækka um 9 milljarða kr. frá yfirstandandi ári, eða 17%. Unnið verður í ýmsum stórum verkefnum á árinu 2025, m.a. á Vestfjörðum, Reykjanesbraut og við Hornafjarðarfljót. Þá verða þrír milljarðar settir í að leggja tengivegi víða um land og að fækka einbreiðum brúm. Þetta kemur fram í tilkynningu frá innviðaráðuneytinu.
Framkvæmdum á vegum, flugvöllum, höfnum og sjóvörnum hefur nú verið forgangsraðað fyrir árið 2025 þar sem ný samgönguáætlun og tilheyrandi aðgerðaáætlun var ekki afgreidd á nýloknu þingi. Fjárlög marka þó á hverjum tíma ramma fyrir framkvæmdir og þjónustu í samgöngum og samgönguáætlun fyrir tímabilið 2020-2034 er áfram í fullu gildi.
Vegaframkvæmdir árið 2025
Alls verður rúmum 27 milljörðum kr. ráðstafað til framkvæmda og viðhalds á vegakerfinu á árinu 2025. Meðal stærstu framkvæmda sem unnið verður að eru eftirtalin: Reykjanesbraut (Krýsuvíkurvegur-Hvassahraun), brú og vegtengingar við Hornafjarðarfljót, tvö verkefni á Vestfjarðavegi (Gufudalssveit og Dynjandisheiði) og Norðausturvegur (Brekknaheiði).
Áfram verður unnið að undirbúningi Sundabrautar. Þá er gert ráð fyrir framlögum vegna undirbúnings jarðgangna á fjórum stöðum (Fljótagöng, Hvalfjarðargöng, Ólafsfjörður/Dalvík og Súðavík/Ísafjörður).
Þar að auki hefjast framkvæmdir vegna Ölfusárbrúar á næsta ári (Hringvegur við Ölfusá) en gert er ráð fyrir því, eins og greint hefur verið frá, að veggjöld af umferð muni standa undir kostnaði við framkvæmdir og tefja því ekki framkvæmdir við aðra samgönguinnviði.
Tengivegir og fækkun einbreiðra brúa
Tæpir 4,3 milljarðar kr. fara í framlög í fjölbreytt sameiginleg verkefni. Þar á meðal verða 2,5 ma. kr. settir í að leggja slitlag á tengivegi um land allt og 500 m.kr. í að fækka einbreiðum brúum, eða samtals 3 ma.kr. Stefnt að því að einbreiðum brúm fækki um fimm árið 2025, á Hringveginum og utan hans.
Til viðbótar við þetta er unnið að fjölbreyttum framkvæmdum á grunni samgöngusáttmála höfuðborgarsvæðisins. Meðal þess sem unnið verður að á næsta ári er Fossvogsbrú, framkvæmdir við Arnarnesveg, nýir hjóla- og göngustígar ásamt ýmsum aðgerðum í umferðastýringu. Samtals nema framlög til þessara verkefna um 6,7 ma. kr.
Framkvæmdir á flugvöllum árið 2025
Uppbygging varaflugvalla í Reykjavík, á Akureyri og Egilsstöðum heldur áfram með innheimtu varaflugvallargjalds. Samhliða verður unnið að uppbyggingu minni lendingarstaða svo þeir geti þjónað hlutverki sínu vegna sjúkra- og almannaflugs. Í fjárlögum verður um 4,7 ma.kr. varið til innanlandsflugvalla þ.a. um 1,4 ma.kr. til ráðstöfunar til framkvæmda á árinu 2025. Meðal þess sem er forgangsraðað á árinu 2025 er vegna fjarstýrðs flugturns annars vegar og viðhalds flugbrauta og hlaða hins vegar á Reykjavíkurflugvelli, flugstöðvar á Akureyri, og undirbúnings akbrautar og flughlaðs á Egilsstöðum. Þá er fé einnig veitt í viðhald af ýmsu tagi vegna flugvalla á eftirtöldum stöðum: Bíldudal, Ísafirði, Grímsey, Þórshöfn, Vopnafirði, Norðfirði, Hornafirði og Vestmannaeyjum.
Áætlunarflug milli Reykjavíkur og Vestmannaeyja annars vegar og Húsavíkur hins vegar yfir vetrartímann verður áfram styrkt.
Framkvæmdir í höfnum og sjóvarnir árið 2025
Áfram verður unnið að uppbyggingu hafnarmannvirkja víða um land.
Ráðuneytið hefur einnig forgangsraðað framkvæmdum á vegum hafnarbótasjóðs fyrir árið 2025. Alls verða framlög ríkisins vegna hafna og sjóvarna rúmur 1,6 ma.kr. árið 2025. Á eftirtöldum stöðum verður unnið við framkvæmdir við hafnir og sjóvarnir: Snæfellsbæ, Grundarfirði, Stykkishólmi, Reykhólahreppi, Bíldudal, Súðavík, Ísafirði, Bolungarvík, Skagaströnd, Sauðárkróki, Siglufirði, Dalvík, Húsavík, Vopnafirði, Borgarfirði eystri, Djúpavogi, Hornafirði, Vestmannaeyjum, Þorlákshöfn, Sandgerði og Njarðvík.
