Dómstól Handknattleikssambands Íslands (HSÍ) hefur kveðið upp dóm í kærumáli ÍBV gegn Haukum vegna leiks Hauka gegn ÍBV í Powerade bikarkeppni karla, meistaraflokki. Lokatölur leiksins urðu 37-29 Haukum í vil.

Málið snýst í grunninn um að leikskýrsla hafi legið fyrir 60 mínútum fyrir leik og verið staðfest af báðum liðum með því að slá inn sk. „pin“ númer í tölvukerfið „HBstatz“. Á leikskýrsluna hafi verið skráð nafn leikmanns kærða nr. 10, Helga Marinós Kristóferssonar. Um kl. 15:20 (40 mínútum fyrir leik) hafi kærði breytt leikskýrslunni og afskráð leikmann nr. 10.

Í hans stað hafi kærði sett á leikskýrslu leikmann nr. 84, Andra Fannar Elísson. Liðsstjóri kæranda hafi sett fram fyrirspurn um hvort breytingin væri heimil og eftirlitsdómari sagst ætla að geta þessa í skýrslu sinni um leikinn.

Telst kærði hafa notað leikmann sem ekki var á löglegri leikskýrslu, sem auk þess kom inn á leikvöll eftir upphafsmerki dómara. Samkvæmt skýru orðalagi ákvæðisins telst kærði því hafa tapað leiknum með markatölunni 0-10.

Með hliðsjón af framansögðu er fallist á kröfur kæranda í málinu. Af því leiðir að kröfum kærða, þ.m.t. um málskostnað, er hafnað.

Í dómsorði segir: Kærði, Knattspyrnufélagið Haukar ehf., telst hafa tapað leik við kæranda, ÍBV Íþróttafélag, sem
fram fór í Powerade bikarkeppni karla, meistararflokki, þann 17. nóvember 2024, með markatölunni 0-10.

Eyjamenn eru því komnir áfram í næstu umferð bikarkeppninnar.

Strákarnir úr leik í bikarnum – Eyjafréttir