Sjómannadagurinn var haldinn hátíðlega um land allt í gær og sjómönnum fagnað. Mikil og skemmtileg dagskrá var í boði hér í Eyjum og var sjómönnum fagnað yfir helgina. Við hjá Eyjafréttum náðum tali af nokkrum konum sjómanna og fengum að spyrja nokkurra spurninga varðandi fjölskyldulífið.

Nafn: Thelma Hrund Kristjánsdóttir

Aldur? 38 ára.

Fjölskylda? Gift Daða Ólafssyni og saman eigum við þrjú börn, Kamillu 11 ára, Kristel 9 ára og Rökkva 6 ára.

Hversu lengi hefur þú verið sjómannsfrú? Það eru komin 13 ár en Daði hefur þó alltaf verið á sjó á sumrin og skotist einhverja túra yfir veturinn með skólanum frá því að við kynntumst fyrir 18 árum.

Á hvaða skipi er maki þinn? Hann vinnur hjá Ísfélaginu og er einmitt að sækja nýja Heimaey VE til Danmerkur þessa stundina.

Kynnist þið þegar maki er á sjó? Við kynnumst í Háskólanum í Reykjavík þá var hann námsmaður en alltaf á sjó á sumrin.

Hefur maki þinn alla ykkar tíð verið á sjó? Svona í og með já.

Hvernig hefur gengið að samræma sjómennsku og fjölskyldulíf? Það hefur yfirleitt gengið mjög vel, enda Daði einstaklega liðtækur í heimilisstörfum þegar hann er í landi.

Helstu kostir sjómennskunnar? Yfirleitt eru góð frí í kringum jól og oft á vorin sem við reynum að nýta vel.

Helstu gallar sjómennskunnar? Þegar úthaldið er langt og jafnvel landað á Þórshöfn á Langanesi til lengri tíma þá getur komið fyrir að hann sé frá töluvert lengi.

Eruð þið með hefð um sjómannahelgina? Já, við förum alltaf á hátíðarhöldin á bryggjunni á laugardeginum þar sem Daði tekur þátt í róðrakeppninni ásamt vinum sínum, síðan röltum við í Klettinn þar sem krakkarnir fá að velja sér nammi, því næst hittist vinahópurinn á einhverjum af frábæru veitingastöðunum hér í bæ. Á laugardagskvöldinu hittum við áhöfnina og förum saman á skemmtunina uppi í Höll. Að lokum er alltaf hátíðlegt að enda helgina á hátíðarhöldunum á Stakkó á sunnudeginum.

Eitthvað að lokum? Innilegar hamingjuóskir með daginn ykkar kæru sjómenn!