Í lok síðasta árs kvöddu forsvarsmenn Vinnslustöðvarinnar tvo öfluga og trausta starfsmenn, Þórð Hallgrímsson, yfirmann á netaverkstæði VSV, og Einar Bjarna hjá Leo Seafood.

Einar lét af störfum fyrir jól, samhliða því að Leo Seafood lokaði endanlega, en Þórður hætti störfum um síðustu áramót. Af því tilefni hittu forsvarsmenn Vinnslustöðvarinnar Einar og Bjarna Rúnar, son hans í Leo á þeirra síðasta vinnudegi þar fyrir jól og var Einari þá færð kveðjugjöf. Þórði var síðan færð kveðjugjöf á árlegri skötuveislu netaverkstæðisins á Þorláksmessu.

Í frétt á vef Vinnslustöðvarinnar er jafnframt rifjuð upp skemmtileg saga sem Einar sagði í samtali við fréttaritara fyrirtækisins og lýsir vel þeim anda og áræðni sem einkenndi starfsemina. Þar segir frá því þegar Daði Pálsson, vinur hans sá á afar glæsilegt og stórt fundarborð í Reykjavík og haft samband við Bjarna Rúnar til að kanna hvort það kæmist ekki örugglega fyrir á skrifstofu Leo Seafood. Bjarni Rúnar mældi því rýmið hátt og lágt og komst að þeirri niðurstöðu að borðið væri einfaldlega of stórt – nánar til tekið um tveimur metrum of langt.

Eftir stutta þögn í símanum kom svarið hjá Daða: „Nú, jæja. Við byggjum þá bara við skrifstofuna.“

Og það varð úr. Ekki var verið að tvínóna við hlutina – lausnin var einföld og framkvæmdin skjót. Að sögn Einars lýsir sagan vel áræðni og verklagi þess tíma, þar sem hlutirnir voru látnir ganga upp með útsjónarsemi og ákveðni.

Þórður hefur starfað hjá Vinnslustöðinni frá árinu 1989 og Einar hjá Godthaab í Nöf / Leo Seafood frá stofnun árið 2001. Báðum eru færðar þakkir fyrir farsælt starf og framlag í gegnum árin.