Sigtryggur Örn Ólafsson, sem notar listamannsnafnið S!ll!, er 15 ára tónlistarmaður og er að stíga sín fyrstu skref í tónlistarheiminum. Hann flutti til Vestmannaeyja í byrjun síðasta árs ásamt fjölskyldunni. Sjálfur hafði hann búið í Kópavogi en er vel tengdur Eyjunum: „Já, pabbi er alinn upp í Vestmannaeyjum, svo ég hef oft komið og verið hér hjá ömmu og afa, en í fyrra fluttum við fjölskyldan til Vestmannaeyja.“

S!ll! hefur undanfarin ár unnið að tónlist og kom meðal annars fram á Rave-ballinu í Barnaskólanum í vetur við góðar undirtektir. „Það var mjög gaman að syngja á Rave og Doctor Victor hefur hjálpað mér mikið í tónlistinni.“

Nú er S!ll! búinn að gefa út lagið „Veit hvað hún vill“, sem hann samdi ásamt vinum sínum, þeim Birki Gauta Bergmann og Jakobi Þór Möller. Lagið kom út seint í gærkvöldi og hefur fengið góðar viðtökur.

Auk þess að gefa út nýtt lag ætlar S!ll! að halda tónleika í kvöld í Ásgarði: „Mig langaði að fagna nýja laginu. Fyrst var hugmyndin að bjóða bara nokkrum vinum og félögum að hlusta á lagið, en svo þegar við vorum að spjalla um þetta stækkaði hugmyndin og við ákváðum að bjóða fleirum að vera með og halda skemmtilega tónleika í Ásgarði,“ segir S!ll! spenntur. Miðasalan fór í gang fyrir hálfum mánuði og hefur gengið vonum framar, en það verður líka hægt að fá miða við dyrnar.

Lagið verður formlega frumflutt í kvöld. Hann samdi það ásamt Birki Gauta og Jakobi Möller og S!ll! biðlar til Eyjamanna að hlusta. „Það væri frábært ef öll eyjan myndi hlusta einu sinni á lagið.“ Lagið má finna til dæmis á Spotify.

Þú ert aðeins 15 ára og að halda tónleika – hvernig tilfinning er það?
„Það er bara geggjuð tilfinning, ég er mjög spenntur fyrir kvöldinu. En það sem hefur verið sérstaklega skemmtilegt er hvað viðtökurnar hafa verið frábærar og ég lofa frábæru stuði í kvöld.“

Hvernig kom það til að þú heldur þessa tónleika núna?
„Bæði er það til þess að fagna laginu og svo hefur mig alltaf langað til að halda tónleika. Ég reyndi fyrst þegar ég var í 4. bekk. Það var einföld útgáfa – ég var á fótboltavellinum og söng lög eftir Herra Hnetusmjör, en það mættu aðeins fjórir. Nú eru liðin sex ár og búið að leggja miklu meira í undirbúninginn fyrir kvöldið og ég vona að það komi fleiri en fjórir í kvöld. Ég er auðvitað bara að gera þetta í fyrsta sinn svona af einhverri alvöru, en mamma og pabbi sögðu þetta alltaf við mig: Þú getur gert allt sem þú vilt ef þú leggur þig allan fram í það.“

Aðspurður um hvenær áhuginn á tónlistinni hafi kviknað segir Sigtryggur að það hafi gerst þegar hann var í þriðja bekk: „Þá spurði bróðir minn mig hvort ég vildi gera lag með sér og ég var sko strax til. Hann setti beat-ið í gang og kom með svakalega flottan texta. Ég var strax til í þetta. Við náðum reyndar aldrei að klára lagið og ég reyndi nokkrum sinnum að stelast í tölvuna hans til að finna það, en fann það aldrei aftur.“

Það leynir sér ekki að bróðir hans er mikil fyrirmynd hjá S!lla. „Bróðir minn leiddi mig út á þessa braut og sendi mér alltaf lögin sem hann gerði og það kveikti og viðhélt áhuganum hjá mér. Mig langar til að feta í fótspor hans.“ S!ll! lítur björtum augum til framtíðar og segist stefna á að gefa út fleiri lög og halda marga tónleika. Hlusta má á lagið í spilaranum hér að neðan.