Engin börn í vistun utan Vestmannaeyja

Fjölskyldu- og tómstundaráð Vestmannaeyja fjallaði um stöðu barnaverndarmála og málefni fatlaðs fólks á fundi sínum nýverið.

Samþykktu framkvæmdaáætlun í barnavernd

Lögð var fram framkvæmdaáætlun í barnavernd fyrir árin 2023–2027. Sviðsstjóri fjölskyldu- og fræðslusviðs og deildarstjóri velferðarþjónustu fóru yfir helstu áherslur og markmið áætlunarinnar.

Ráðið samþykkti áætlunina fyrir sitt leyti og vísaði henni til bæjarstjórnar til endanlegrar staðfestingar.

Staða vistunarmála í barnavernd

Deildarstjóri velferðarþjónustu kynnti jafnframt stöðu vistunarmála og verkferla þeim tengdum. Fram kom að staða vistunarmála í barnavernd hefur breyst mikið á undanförnum árum og þróunin verið í rétta átt.

Verkferlar eru skýrir og markvisst er fylgst með öllum börnum sem eru í vistun á vegum sveitarfélagsins. Þá kom fram að engin börn eru nú í vistun utan Vestmannaeyja.

Málefni fatlaðs fólks kalla á aukið fjármagn

Sviðsstjóri fjölskyldu- og fræðslusviðs fór einnig yfir stöðu og þróun málaflokks fatlaðs fólks, bæði á landsvísu og í Vestmannaeyjum.

Fram kom að málaflokkurinn hefur tekið miklum breytingum frá því hann var fluttur frá ríki til sveitarfélaga árið 2011. Kröfur um magn og gæði þjónustu hafa aukist verulega og ljóst er að málaflokkurinn kallar á sífellt meira fjármagn.

Helstu áskoranir fram undan snúa að búsetumálum fatlaðs fólks og þeirri þjónustu sem þarf að fylgja slíkri búsetu. Ráðið þakkaði fyrir kynninguna og umræðuna um stöðu málaflokksins.

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Ritstjórn

frettir@eyjafrettir.is

Samþykktu framkvæmdaáætlun í barnavernd

Staða vistunarmála í barnavernd

Málefni fatlaðs fólks kalla á aukið fjármagn

Nýjustu fréttir

Góð ráð fyrir siglingu

Sjóveiki