Eyjamaðurinn Erlingur Birgir Richardsson byrjar vel sem aðalþjálfari þýska liðsins Minden en liðið vann öruggan 30-21 sigur á Ludwigshafen á útivelli í þýsku B-deildinni í handbolta í gærkvöldi. Þetta var annar sigur liðsins í jafnmörgum leikjum undir stjórn Erlings.

Minden hafði mikla yfirburði í leiknum og leiddi með níu mörkum í hálfleik, 16-7. Gestirnir náðu mest tólf marka forskoti í síðari hálfleik og héldu síðan öruggri forystu til leiksloka.

Minden er í sjöunda sæti deildarinnar með sjö stig eftir sjö leiki. Ludwigshafen situr í 15. sæti með fjögur stig.

Næsti leikur Minden er á heimavelli gegn toppliði Eintracht Hagen föstudaginn 16. október.