Samningur Vegagerðarinnar um sanddælingu í Landeyjahöfn hefur verið gagnrýndur allt frá opnun hafnarinnar árið 2010. Undantekning voru árin 2015 til 2017, þegar belgíska fyrirtækið Jan de Nul bauð lægst og sá um verkið. Tilboð þeirra nam um 588 milljónum króna fyrir dælingu á 750 þúsund rúmmetrum af sandi.

Önnur ár hefur Björgun ehf. annast dælinguna og oft hefur höfnin verið lokuð, meðal annars í 160 daga veturinn 2014 til 2015 – met sem mögulega verður slegið í vetur.

Í nýjasta útboði vegna viðhaldsdýpkunar fyrir árin 2026 til 2029 bárust fjögur tilboð. Lægsta tilboðið kom frá Sjótækni ehf. á Tálknafirði, um 1,19 milljarðar króna, sem er verulega undir kostnaðaráætlun Vegagerðarinnar upp á 2,03 milljarða. Rohde Nielsen bauð um 2,12 milljarða, Jan de Nul um 2,31 milljarð og Björgun Sement ehf. hæst, um 2,73 milljarða króna.

Reynslan af Landeyjahöfn sýnir að lægsta tilboð tryggir ekki endilega farsæla niðurstöðu. Mikilvægast er að samningar standist og að verkefnið skili raunverulegum árangri. Margir Eyjamenn minnast áranna 2015 til 2017 með hlýhug, þegar Jan de Nul sá um verkið með öflugu skipi, Galilei, sem gat dælt allt að 15.000 tonnum á sólarhring. Belgarnir, eða jafnhæfir aðilar, væru því velkomnir til Vestmannaeyja.