Í tilefni af Barnamenningardögum á Suðurlandi stendur börnum og ungmennum í Vestmannaeyjum til boða að taka þátt í ljósmyndakeppninni „Suðurland með augum barna“. Keppnin er liður í sameiginlegu verkefni sveitarfélaga á Suðurlandi þar sem markmiðið er að gefa yngri kynslóðinni tækifæri til að tjá sig í gegnum ljósmyndun og sýna sitt sjónarhorn á nærumhverfi sitt.

Keppnin er opin börnum og ungmennum á aldrinum 5 til 18 ára og er skipt í þrjá aldursflokka, 5 til 8 ára, 9 til 12 ára og 13 til 18 ára. Hver þátttakandi má senda inn allt að þrjár ljósmyndir.

Þemað hjá börnum hér í Eyjum tengist Vestmannaeyjum og er þátttakendum frjálst að túlka það á sinn hátt. Myndirnar geta til dæmis sýnt náttúru, daglegt líf, fólk, leik, menningu eða annað sem fangar athygli.

Valin verða bestu verk í hverju sveitarfélagi og fara þrjár efstu myndirnar áfram í sameiginlega stafræna ljósmyndasýningu undir yfirskriftinni „Suðurland með augum barna“, þar sem verk barna víðs vegar af Suðurlandi verða sýnd saman.

Skilafrestur er til 12. apríl og skal senda myndirnar á netfangið barnamenning@vestmannaeyjar.is. Mikilvægt er að skrá fullt nafn og kennitölu og merkja umsóknina „Ljósmyndakeppni“.

Nánari upplýsingar um reglur má sjá á vef Vestmannaeyjabæjar.