ÍBV og KA mætast í fyrsta leik úrslitakeppni Olís deildar karla í handbolta í kvöld. Leikurinn fer fram í Íþróttamiðstöð Vestmannaeyja og hefst klukkan 18:00.

Það er mikið undir strax í fyrsta leik og ljóst að Eyjamenn ætla að byrja einvígið af krafti. Handknattleiksdeild ÍBV hefur kallað eftir öflugum stuðningi og hvetur Eyjamenn til að mæta snemma og skapa alvöru heimavallarstemningu.

Upphitun hefst klukkan 17:00 í nýja fundarsalnum þar sem hægt verður að fá pylsur og drykki áður en haldið er í stúkuna. Þá munu Hvítu riddararnir mæta á svæðið og stýra stemningunni eins og þeim er einum lagið.

Leikurinn verður einnig sýndur á Handboltapassanum fyrir þá sem ekki eiga heimangengt. Eyjamenn þurfa á stuðningnum að halda – og allt bendir til þess að stúkan verði þéttsetin og stemningin rafmögnuð frá fyrstu mínútu. Nánari umfjöllun verður birt hér á Eyjafréttum að leik loknum.