Sigurjón Þorkelsson varð hraðskákmeistari Vestmannaeyja 2026 þegar Hraðskákmeistaramót Vestmannaeyja fór fram á skírdag í skákheimili Taflfélags Vestmannaeyja (TV).

Alls tóku 10 keppendur þátt, tefldar voru níu umferðir og tímamörk voru 5 mínútur á skák auk 3 sekúndna viðbótar fyrir hvern leik.

Á árum áður voru 5 mínútur algeng tímamörk í hraðskák, en þá kom oft fyrir að keppendur féllu á tíma og töpuðu skákum. Með því að bæta við 3 sekúndum fyrir hvern leik má að mestu koma í veg fyrir slíkt. Skákklukkur sem bjóða upp á þessa viðbót eru kenndar við Bobby Fischer, fyrrum heimsmeistara í skák, sem átti hugmyndina að þessum búnaði. Slíkt tímakerfi er einnig notað í lengri kappskákum.

Sigurjón Þorkelsson sigraði mótið með 8,5 vinninga af níu mögulegum. Í 2.–3. sæti urðu jafnir Arnar Bogi Andersen og Arnar Sigurmundsson með 6,5 vinninga hvor. Í fjórða sæti hafnaði Auðunn Haraldsson með 5,5 vinninga.

Árangur Arnars Boga Andersen var sérstaklega athyglisverður en hann lagði marga eldri og reyndari keppendur að velli, segir í tilkynningu frá Taflfélagi Vestmannaeyja.