Herjólfur siglir til Þorlákshafnar seinnipartinn í dag og þar til annað verður tilkynnt. Brottför frá Vestmannaeyjum er kl. 07:00 og 16:00, en frá Þorlákshöfn kl. 10:45 og 19:45.

Þetta er kunnuglegt stef á Facebook-síðu Herjólfs síðustu daga, vikur og mánuði, en nú er von um betri tíð með blóm í haga.

Rétt í þessu var ölduhæð í Landeyjahöfn um 2,5 metrar og fer lækkandi. Samkvæmt ölduspá verður hún innan við tveir metrar á morgun og á mánudag.

Ljósi punkturinn er sá að Álfsnesið, dæluskip Björgunar, er rétt komið fram hjá Sandgerði á leið sinni til Landeyjahafnar. Það er ekki hraðskreiðasta skip í heimi – lullar áfram á um sjö mílum – en kemst vonandi á leiðarenda, þó hægt fari. Gangi allt að óskum gæti styttst í að Landeyjahöfn verði opnuð óháð flóði og fjöru.