Opnun tilboða í viðbyggingu við Íþróttamiðstöð Vestmannaeyja fór fram 14. apríl síðastliðinn og bárust alls fjögur tilboð í verkið. Um er að ræða eitt stærsta framkvæmdaverkefni bæjarins á næstu árum.

Lægsta tilboðið barst frá fyrirtækinu Steini og Olli ehf. og hljóðar það upp á 1.421.818.336 krónur. Tilboðið er um 51,7 milljónum króna undir kostnaðaráætlun verksins sem nam 1.473.501.500 krónum.

Önnur tilboð sem bárust voru eftirfarandi:

• K16: 1.561.352.112 kr.
• Eykt: 1.762.948.794 kr.
• Ístak hf.: 1.799.890.781 kr.

Framkvæmda- og hafnarráð Vestmannaeyja fundaði í hádeginu í dag þar sem þetta mál var eina málið á dagskrá. Ráðið samþykkti að taka tilboði lægstbjóðanda og var sviðsstjóra umhverfis- og framkvæmdasviðs falið að ganga til samninga við Steina og Olla á grundvelli fyrirliggjandi tilboðs.

Málinu hefur jafnframt verið vísað til bæjarráðs til frekari umfjöllunar og staðfestingar.