Erindi um mögulega uppbyggingu 120 herbergja hótels í Hásteinsgryfju var tekið fyrir á fundi skipulags- og umhverfisráðs Vestmannaeyja.

Það er Þröstur B. Johnsen sem sækir um að fá landi úthlutað fyrir uppbyggingu hótels á svæðinu. Með erindinu fylgdu myndir af mögulegu útliti hótelsins auk afrits af deiliskipulagi íþróttasvæðisins við Hástein þar sem gert er ráð fyrir hótellóð í Hásteinsgryfju.

Í niðurstöðu skipulags- og umhverfisráðs kemur fram að um sé að ræða lóð sem sé ekki til úthlutunar eins og staðan er í dag. Af þeim sökum hafi ráðið ekki heimild til að afgreiða erindið sjálft og sé því málinu vísað áfram til bæjarráðs til frekari meðferðar.

Hásteinsgryfja hefur um árabil verið til umræðu sem mögulegt uppbyggingarsvæði og samkvæmt deiliskipulagi er þar gert ráð fyrir hótelstarfsemi. Fyrirhugað hótel yrði með um 120 herbergjum ef af framkvæmdinni verður.