Prufusigling Herjólfs III í gær gekk mjög vel að sögn G. Péturs Matthíassonar, forstöðumanns samskiptadeildar Vegagerðarinnar, en enn á eftir að klára ákveðna þætti áður en nýtt haffærniskírteini verður gefið út.

„Siglingin í gær gekk mjög vel og verið er að leggja lokahönd á undirbúninginn,“ segir Pétur í samtali við Eyjafréttir.

Haffærniskírteini skipsins hefur þó ekki enn verið gefið út. „Það þarf að skoða betur mál varðandi björgunarbúnað, sem vonandi gengur hratt fyrir sig,“ segir Pétur.

Herjólfur III hefur verið mikið í umræðunni undanfarna daga í ljósi stöðunnar á Herjólfi IV, sem siglir nú einungis á annarri skrúfu, og hafa margir kallað eftir því að skipið verði tiltækt sem varakostur í samgöngum við Vestmannaeyjar.