Ísfélag hf. skilaði 2,8 milljarða króna hagnaði eftir skatta á fyrsta ársfjórðungi ársins 2026 samkvæmt uppgjöri félagsins sem birt var í dag. Góð loðnuvertíð, sterk aflabrögð og hátt verð á afurðum félagsins eru meðal helstu skýringa á góðri afkomu.

Rekstrartekjur félagsins námu rúmum 9 milljörðum króna á tímabilinu, samanborið við 4,6 milljarða á sama tíma í fyrra. EBITDA-framlegð var um 3,9 milljarðar króna eða 43,2% af rekstrartekjum.

Í tilkynningu félagsins kemur fram að uppsjávarafli skipa Ísfélagsins hafi verið um 33.600 tonn á fyrsta ársfjórðungi en bolfisk- og rækjuafli um 4.200 tonn. Þá voru framleidd rúm 13.300 tonn af frystum uppsjávarafurðum auk 5.600 tonna af mjöli og lýsi.

Rafvæðing í Eyjum og breytingar á flotanum

Í yfirlýsingu Stefáns Friðrikssonar forstjóra kemur fram að á þessu ári ljúki rafvæðingu fiskimjölsverksmiðju félagsins í Vestmannaeyjum. Hann segir mikilvægt að næg raforka verði tiltæk á sanngjörnu verði svo fjárfestingin skili sér í minni losun koltvísýrings.

Þá segir að breytingum á skiparekstri félagsins sé að mestu lokið. Uppsjávarskipið Suðurey og togarinn Ottó M. Þorláksson séu til sölu og að togskipið Jón á Hofi hafi verið selt og afhent nýjum eigendum í janúar.

Frystihúsum lokað tímabundið í sumar

Forstjórinn gagnrýnir jafnframt nýjan makrílsamning stjórnvalda harðlega og segir skerðingu á hlutdeild Íslands í makrílveiðum hafa veruleg áhrif á starfsemi félagsins. Afleiðingin verði sú að frystihús félagsins í Vestmannaeyjum og á Þórshöfn verði lokuð í nokkrar vikur í sumar vegna verkefnaskorts. Slíkt hafi ekki gerst í rúma tvo áratugi.

Í uppgjörinu kemur einnig fram að loðnuvertíðin hafi staðið yfir í 41 dag og að hásetahlutur á Sigurði VE og Heimaey VE hafi verið á bilinu 8,7 til 8,9 milljónir króna á vertíðinni eftir leiðréttingar samkvæmt kjarasamningum.