Áfram Noregur í kvöld - Heimisáhrifin virka

Eyjafréttir
·
Áhugavert
·
11. júlí 2026

Nú er komið að okkur Íslendingum að standa með Norðmönnum. Þeir stóðu sannarlega með okkur sumarið 2016

Ómar

Garðarsson

Þegar Norðmenn mæta Englendingum í átta liða úrslitum Evrópumótsins í kvöld rifjast upp ógleymanlegar minningar frá sumrinu 2016, þegar íslenska karlalandsliðið heillaði knattspyrnuheiminn á Evrópumótinu í Frakklandi. Eftir sögulegan 2:1 sigur Íslands á Englandi 27. júní það ár ríkti mikil gleði víða um Norðurlönd. Í Noregi var afrekinu fagnað sérstaklega og eitt stærsta dagblað landsins, Verdens Gang (VG), tileinkaði íslenska liðinu forsíðu daginn eftir.

Á forsíðunni var mynd af Kára Árnasyni fagna sigrinum og fyrirsögnin var ekki á norsku heldur íslensku: „Já, við elskum þetta land!“ Undir henni var skýrt hvað setningin þýddi á norsku. Þetta vakti mikla athygli enda er „Ja, vi elsker dette landet“ fyrsta setning norska þjóðsöngsins og hefur sterka táknræna merkingu fyrir Norðmenn. Með þessari óvenjulegu forsíðu sýndi VG bæði íslenska landsliðinu og íslensku þjóðinni mikla virðingu. Og ennþá sjá Norðmenn eftir því að missa Ísland í hendur Dana 1397.

**Erling er, þó ungur sé, kominn í hóp hinna stóru í alþjóðaknattspyrnunni.**

Við vorum stödd í Noregi þessa daga og fundum vel fyrir stemningunni sem ríkti. Hvar sem við komum vakti það athygli að við vorum Íslendingar og Norðmenn vildu ræða afrek landsliðsins. Það er gaman að rifja upp þá daga núna. Vorum í bænum Bryne, skammt frá Stavanger þar sem Erling Haaland ólst upp. Á þeim tíma var hann efnilegur ungur leikmaður. Hver veit nema framganga íslenska liðsins hafi orðið honum og öðrum ungum norskum knattspyrnumönnum innblástur. Það er ekki ólíklegt.

Frá þeim tíma hafa „Heimisáhrifin“, sem ég kenni við okkar mann, Heimi Hallgrímsson orðið áberandi víða um heim. Litlar knattspyrnuþjóðir hafa í auknum mæli sýnt að þær geta keppt við stærstu þjóðir heims með góðu skipulagi, samheldni og trú á eigin getu. Árangur Grænhöfðaeyja á HM í ár er eitt skýrasta dæmið um þá þróun,en þau eru fleiri.

Í kvöld hafa hlutverkin hins vegar snúist við. Nú eru það Norðmenn sem freista þess að leggja Englendinga að velli í átta liða úrslitum og skrifa sinn eigin kafla í knattspyrnusöguna. Nú er komið að okkur Íslendingum að standa með Norðmönnum. Þeir stóðu sannarlega með okkur sumarið 2016 og fögnuðu afrekum íslenska landsliðsins eins og þau væru þeirra eigin.

Ómar Garðarsson.

Nýjustu fréttir

Áhugavert

Áfram Noregur í kvöld – Heimisáhrifin virka

Úr blaði Eyjafrétta

Draumurinn orðinn að veruleika

Áhugavert

Einstakt safn Magnúsar vakti forvitni á Goslokahátíð

Myndband

Þrjár vikur í Þjóðhátíð – uppbyggingin hafin í Herjólfsdal

Áhugavert

Sumarlesturinn hefur aldrei farið betur af stað

Skipulagsmál

Áform um þrjú ný einbýlishús við Reglubraut

Aðsend grein

Evrópusambandið, meira en tollabandalag

Áhugavert

50 ár frá opnun sundlaugar Vestmannaeyja

Mest lesið

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Nýjustu fréttir

Góð ráð fyrir siglingu

Sjóveiki