Alls hafa 236.536 farþegar ferðast með Herjólfi það sem af er ári. Það er 14,3 prósentum færra en á sama tíma í fyrra.
Þetta kom fram þegar Ólafur Jóhann Borgþórsson, framkvæmdastjóri Herjólfs ohf., fór yfir farþegatölur og rekstur félagsins á fundi bæjarráðs Vestmannaeyja.
Rekstur Herjólfs er undir áætlun, sem einkum er rakið til þess hve erfiðar siglingar til Landeyjahafnar voru fram yfir miðjan maí.
Vilja Herjólf III sem varaskip í Eyjum
Á fundinum var jafnframt rætt um stöðu Herjólfs III og fyrirkomulag samgangna næsta vetur. Fulltrúar Vestmannaeyjabæjar funduðu 18. ágúst með Bergþóru Þorkelsdóttur vegamálastjóra og Hilmari Stefánssyni, forstöðumanni almenningssamgangna, um málið.
Vestmannaeyjabær lagði áherslu á að Herjólfur III yrði tiltækur sem varaskip í Vestmannaeyjum næsta vetur til að tryggja öryggi og fyrirsjáanleika í samgöngum milli lands og Eyja.
Af hálfu Vegagerðarinnar kom fram að boðaður væri verulegur niðurskurður á fjárveitingum til almenningssamgangna og að skortur á fjármagni stæði í vegi fyrir rekstri tveggja varaskipa. Engin endanleg ákvörðun hefði þó verið tekin um framtíðarnýtingu Herjólfs III.
Niðurstaðan var að hefja formlegt samtal milli Herjólfs ohf., Vestmannaeyjabæjar og Vegagerðarinnar um aðkomu Herjólfs að umsjón og mönnun Herjólfs III næsta vetur.
„Herjólfur er okkar þjóðvegur“
Bæjarráð segir óásættanlegt að samgöngur við Vestmannaeyjar séu flokkaðar sem almenningssamgöngur og sæti verulegum niðurskurði á komandi árum.
„Herjólfur er okkar þjóðvegur,“ segir í bókun ráðsins. Þar kemur einnig fram að slík áform samræmist illa yfirlýsingum ríkisstjórnarinnar um mikilvægi bættra samgangna og uppbyggingar innviða um land allt.
Bæjarráð skorar á ríkisstjórn Íslands og innviðaráðherra að tryggja að samgöngur við Vestmannaeyjar verði ekki skertar. Jafnframt krefst ráðið þess að tryggt verði nægilegt fjármagn svo Herjólfur III geti verið til taks í Vestmannaeyjum næsta vetur sem varaskip og öryggisnet fyrir samfélagið.
