Eyjamaðurinn Tómas Bent Magnússon og félagar hans í Hearts tryggðu sér í kvöld sæti í deildarkeppni Sambandsdeildar Evrópu í fótbolta eftir sigur í vítaspyrnukeppni gegn Rapid Vín, í seinni leik liðanna.

Tómas Bent kom inn á 15. mínútu, í stöðunni 0-0. Ercan Can kom heimamönnum í Rapid Vín yfir á 35. mínútu og var staðan 1-0 í hálfleik.

Tómas Bent fékk svo að líta rauða spjaldið á 76. mínútu eftir að hafa fengið sitt annað gula spjald. Þrátt fyrir liðsmuninn tókst Hearts að jafna metin þegar Pierre Landry Kaboré skoraði á 79. mínútu.

Þar sem fyrri leik liðanna lauk með 2-2 jafntefli var staðan því 3-3 samanlagt og þurfti að grípa til framlengingar.

Calvin Miller kom Hearts yfir snemma í framlengingunni og allt stefndi í sigur Hearts. Nenad Cvetkovic jafnaði hins vegar metin fyrir Rapid Vín á lokamínútu framlengingarinnar og því þurfti að ráða úrslitum í vítaspyrnukeppni.

Hearts reyndist sterkari aðilinn í vítaspyrnukeppninni og tryggði sér þar með sæti í deildarkeppni Sambandsdeildarinnar.