Bæjarráð Vestmannaeyja hefur ákveðið að setja aðra og þriðju hæð Ægisgötu 2 aftur á sölu. Ástæðan er sú að tilboðsgjafar náðu ekki að ljúka fjármögnun kaupanna innan þeirra fresta sem þeim höfðu verið veittir.

Bæjarráð samþykkti í apríl 480 milljóna króna tilboð í eignina og var sú ákvörðun síðar staðfest af bæjarstjórn.

Tilboðsgjöfum var í lok júní veittur tveggja vikna frestur til að ganga frá kaupsamningi svo þeir gætu lokið fjármögnun. Fresturinn var síðar framlengdur til 17. ágúst og að honum loknum óskuðu tilboðsgjafar eftir enn frekari fresti.

Bæjarráð varð ekki við þeirri beiðni og fól stjórnsýslu Vestmannaeyjabæjar að setja eignina aftur á sölu.