Starfshópur um mótun nýrrar ferjuáætlunar hefur hafið störf. Hópnum er ætlað að greina stöðu ferjusiglinga á Íslandi og móta heildstæða stefnu ásamt aðgerðaáætlun um öruggar og áreiðanlegar ferjusamgöngur.

Þetta kemur fram í tilkynningu frá innviðaráðuneytinu. Eyjólfur Ármannsson innviðaráðherra skipaði starfshópinn síðsumars og er gert ráð fyrir að hann ljúki störfum fyrir 1. desember næstkomandi.

Stefnt er að því að í aðgerðaáætluninni verði meðal annars sett fram framkvæmda- og kostnaðaráætlun um endurnýjun íslenska ferjuflotans. Starfshópurinn var skipaður í samræmi við aðgerð í samgönguáætlun fyrir árin 2026–2040.

„Það er brýn nauðsyn að móta fyrstu heildstæðu stefnu til framtíðar um ferjusamgöngur á Íslandi. Mikilvægt er að greina þarfir fyrir slíkar samgöngur og hvernig best fer á því að skipuleggja þær með tilliti til samgönguþarfa, öryggis og orkuskipta,“ segir Eyjólfur Ármannsson innviðaráðherra í tilkynningunni.

Samráð við ferjusamfélög

Sérstök áhersla verður lögð á gott samráð við hagaðila. Af þeim sökum var óskað eftir tengiliðum frá sveitarfélögum sem reiða sig á ferjusamgöngur.

Starfshópurinn mun eiga samráð við tengiliðina og gefa þeim kost á að veita umsögn um drög að niðurstöðum áður en þær verða afhentar ráðherra.

Í starfshópnum sitja:

• Sóley Ragnarsdóttir, formaður, án tilnefningar
• Hilmar Stefánsson, tilnefndur af Vegagerðinni
• Jón Gunnar Jónsson, tilnefndur af Samgöngustofu
• Sunna Þórðardóttir, tilnefnd af atvinnuvegaráðuneytinu

Ekki verður greitt sérstaklega fyrir störf í starfshópnum, segir í tilkynningu ráðuneytisins.