Ísfisktogararnir Bergey VE og Vestmannaey VE hafa báðir landað fullfermi í Neskaupstað síðustu daga. Bergey kom til löndunar á sunnudag og Vestmannaey í gær, mánudag. Skipstjórarnir segja frá veiðiferðunum á vef Síldarvinnslunnar.

Þorskurinn uppistaðan hjá Bergey

Ragnar Waage Pálmason, skipstjóri á Bergey, segir veiðarnar hafa gengið vel.

„Við fórum út á fimmtudagskvöld og komum til löndunar á sunnudagsmorgun þannig að veiðarnar gengu býsna vel. Það vantaði fisk í vinnsluna hjá Vísi í Grindavík þannig að við höfðum heimild til að taka þorsk í túrnum og langmestur hluti aflans var þorskur. Við vorum mest að veiðum í Litladýpinu og síðan einnig við Gullfestuna. Veður var ljúft og gott og í reynd gekk þetta eins og best verður á kosið,“ segir Ragnar Waage.

Ýsan lét bíða eftir sér

Birgir Þór Sverrisson, skipstjóri á Vestmannaey, segir áhöfnina hafa leitað nokkuð að ýsu án árangurs. Góð veiði fékkst hins vegar á Þórsbanka.

„Við byrjuðum að toga á Pétursey og héldum austur eftir í ýsuleitinni en ýsan lætur bíða eftir sér. Við enduðum á Þórsbankanum og þar var góð veiði. Það fæst alltaf fallegur fiskur á Þórsbanka og þar fékkst núna þorskur og talsvert af blálöngu. Um helmingur aflans í veiðiferðinni var þorskur en síðan var þetta mest blálanga, ufsi og karfi,“ segir Birgir Þór.