Hvíslað er um það í Eyjum að þingmenn Suðurkjördæmis mættu gjarnan hugsa út fyrir boxið við skipulag kjördæmavikunnar. Eða að minnsta kosti út fyrir hópferðabílinn.

Enn á ný var fundi með bæjarstjórn Vestmannaeyja frestað vegna samgangna. Það er auðvitað snúið að koma heilu kjördæmisliði yfir sjóinn þegar ölduspáin hentar ekki dagskránni. En hver sagði að allir þyrftu að vera samferða?

Framsókn, Flokkur fólksins, Samfylking og Sjálfstæðisflokkur hafa hvert um sig tvo þingmenn í kjördæminu. Hefði annar þingmaður hvers flokks tekið stefnuna á Eyjar hefði hinn getað sinnt fundum á fastalandinu. Karl Gauti Hjaltason, þingmaður Miðflokksins, var þegar kominn til Eyja. Með þessu móti hefðu fimm þingmenn, helmingur þingmanna kjördæmisins, getað sest að fundarborðinu hér.

Það hefði nú varla verið fámennt. Og fimm flokkar við borðið.

Eyjamenn þekkja það að þurfa að breyta áætlunum, leggja fyrr af stað og fara lengri leiðina. Það er hluti af því að búa í eyjasamfélagi. Kjördæmavika gæti verið ágætt tækifæri fyrir þingmenn til að kynnast þeim veruleika af eigin raun.

Ekki er ætlast til að þingmenn ráði við ölduhæðina. En kannski mætti ætlast til að þeir réðu við að skipta liði.