Það er víðar spilaður handbolti en í Ungverjalandi því kvennalið ÍBV stendur í ströngu þessa dagana. Þær mættu Aftureldingu í Mosfellsbæ í gærkvöldi og unnu þar góðan sigur og eiga svo annan útileik gegn Fram komandi laugardag. Sigurður Bragason þjálfari liðsins er ánægður með stöðuna á liðinu en hann er allt annað en sáttur með ástandið í samgöngumálum við Vestmannaeyjar þessa dagana.
Ónýtt hrúgald
„Þetta er náttúrlega alveg glatað að bara þessir tveir leikir skuli kosta okkur rúmlega tvo daga í vinnu. Hér er 16 manna hópur þar sem 9 eru í fullri vinnu og aðrir í námi. Þessi hópur verður allur fjarverandi næstum hálfa vikuna.“ En liðið hefur þurft að ferðast til og frá Þorlákshöfn frá því lokað hefur verið í Landeyjahöfn síðustu daga sökum ófullnægjandi dýpis. „Ég er búinn að vera í þessu meistaraflokksbrölti í tæp 30 ár og þetta er það lélegasta sem mér hefur verið boðið upp á. Þegar ég var að byrja í þessu var flogið með fokker fram og til baka sem beið með áætlun þar til eftir leiki. Eftir að það hætti var ýmist flogið með áætlun eða á Bakka og komið heim að kvöldi til. Nú er fátt annað í boði en Herjólfur eða rándýrt leiguflug. Maður væri kannski líka ekki í þessu tuði ef það væri eitthvað verið að gera. Hvers vegna yfirvöld bregðast bara við þegar allt er komið í skrúfuna? Af hverju í ósköpunum er t.d. ekki komið alvöru grafskip í þetta verkefni núna 12 árum eftir opnun hafnarinnar? Það sjá það allir sem vilja að þetta hrúgald sem okkur er boðið upp á er ónýtt.“
Lélegur undirbúningur
Sigurður segir fleiru fórnað en vinnutapi og kostnaði við gistingu og uppihald. „Við erum að reyna að halda úti topp liði hérna og setja pening í þetta. Svona brölt bitnar líka á æfingum, undirbúningi og hvíld leikmanna það segir sig sjálft. Nú erum við að fara mæta toppliði á laugardag við komum heim seinnipartinn í dag og förum aftur í skipið á morgun það sjá það allir að þetta er ekki góður undirbúningur.“ ÍBV liðið á sjö leiki á dagskrá í febrúar og því ljóst að nóg er fram undan hjá Sigga og stelpunum. „Æ ég er bara ógeðslega fúll með þetta og það er kannski eina leiðina að láta aðeins í sér heyra, ég hef allavegana ekki séð þingmenn eða aðra stökkva til með einhverja lokunarstyrki fyrir okkur við þessar aðstæður þrátt fyrir mikinn kostnað og tekjutap,“ sagði Sigurður að lokum.
