Umræða um samgöngumál fór fram á fundi bæjarráðs í vikunni. Íris Róbertsdóttir, bæjarstjóri, greindi frá áherslu innviðaráðherra, um að tryggja tímabundið lágmarksþjónustu, skv. skilgreiningu ráðuneytisins, á flugleiðinni Reykjavík Vestmannaeyjar á meðan að markaðslegar forsendur eru ekki til staðar, enda flugið mikilvægt fyrir íbúa og atvinnulíf í Vestmannaeyjum yfir hörðustu vetrarmánuðina þegar mestar líkur eru á því að veður hamli siglingum í Landeyjahöfn.

Innviðaráðuneytið hefur ákveðið að leita eftir verðtilboðum í flug með farþega og vörur til og frá Vestmannaeyjum. Um verður að ræða tímabundinn samning frá 16. desember 2022 til 31. mars 2023, með möguleika á framlengingu, og að farnar verði þrjár ferðir í viku. Gert er ráð fyrir að tvær ferðir af þremur verði á sama degi.

Samkvæmt upplýsingum frá innviðaráðuneytinu er verið að fara yfir þau verðtilboð sem bárust í flugleiðina og mun það skýrast næstu daga.

Vestmannaeyjabær hefur átt í samtali við ráðuneytið um flugið, með áherslu á að hefja ríkisstyrkt áætlunarflug milli lands og Eyja til framtíðar.

Bæjarráð bindur í niðurstöðu sinni vonir við að það gangi eftir að tryggja lágmarksflug til og frá Vestmannaeyjum í vetur.