Eyjamenn unnu afar sannfærandi sigur á ÍR í fyrstu umferð Olísdeildar karla í kvöld. Lokatölur urðu 22:30 og fáir sem áttu von á því að ÍBV myndi vinna ÍR með átta mörkum enda komust ÍR-ingar í úrslitakeppnina síðasta vetur. En Eyjamenn tefla fram geysisterku liði og hafa fengið góðan liðsauka fyrir veturinn. En í dag fóru þeir í fylkingarbrjósti þeir Theodór Sigurbjörnsson, Grétar Eyþórsson og Haukur Jónsson, allt peyjar sem hafa alist upp hjá félaginu.