Forsvarsmenn Vestmannaeyjabæjar hafa svarað fyrirspurn Eyjafrétta í kjölfar opinbers pistils fyrrverandi starfsmanns þar sem sett var fram gagnrýni á starfsumhverfi og stjórnarhætti hjá bænum.

Í svari bæjarins segir að engar formlegar kvartanir eða ábendingar hafi borist á undanförnum árum sem varði starfsumhverfi eða samskipti stjórnenda og starfsfólks. „Hjá Vestmannaeyjabæ starfa rúmlega 500 starfsmenn við 18 stofnanir. Ef fyrirspurn Eyjafrétta á eingöngu við Ráðhús að þá hafa engar formlegar kvartanir eða ábendingar borist síðustu ár,“ segir í svarinu.

Sjá fyrri umfjöllun: Umræða skapast um starfsumhverfi hjá Vestmannaeyjabæ

Þá segir jafnframt að meðferð mannauðsmála fari fram með margvíslegum hætti. Bent er á í svarinu að til staðar sé mannauðsstefna, innri starfsmannavefur með verklagsreglum og samskiptasáttmáli sem unnið sé eftir á bæjarskrifstofum. Einnig segir að reglulega séu framkvæmdar mannauðskannanir og að niðurstöður þeirra sýni aukna starfsánægju.

„Reglulega eru gerðar mannauðskannanir, nú síðast í mars, og sýna niðurstöður að starfsánægja hefur aukist jafnt og þétt síðustu ár. Regluleg starfsmannaviðtöl styðja þær niðurstöður,“ segir í svari bæjarins. Að endingu er tekið fram í svari bæjaryfirvalda að hvorki sé hægt að tjá sig um einstök starfsmannamál né umræðu á samfélagsmiðlum.