Breiðafjarðarferjan Baldur fer til Vestmannaeyja og mun sigla milli lands og Eyja meðan ástandið í Landeyjahöfn varir. Þetta kemur fram í tilkynningu frá Vegagerðinni.

Samkomulag hefur náðst um þetta og reiknað með að Baldur hefji siglingar á föstudaginn en nokkurn tíma tekur fyrir skipið að sigla til Vestmannaeyja. Á meðan falla ferðir Baldurs yfir Breiðafjörð niður.

Baldur mun leggja af stað á fimmtudagsmorgun. Verið er að setja saman siglingaáætlun fyrir viðbótarsiglingarnar en gert er ráð fyrir að fyrsta ferð geti orðið á föstudagmorgun.

Nánari upplýsingar um siglingaáætlun verður gefin út af Herjólfi ohf. um leið og hún liggur fyrir.

Ekki er útlit fyrir vegna veðurs og sjólags að hægt verði að hefja dýpkun fyrr en á föstudag. Horfurnar til dýpkunar eru ágætar næstu daga á eftir.