Allur úrgangur nýttur sem áburður

Í Viðlagafjöru eru risin fjögur af átta lokuðum kerjum sem verða  klár í lok október. Öll verða sandblásin að innan og er sú vinna hafin. Loks verða kerin húðuð að innan með til þess gerðu efni. Byrjað er á minni kerjum  sem seiðin eru í stuttan tíma áður en eldið hefst í stóru tönkunum. Allt á þetta að vera tilbúið í lok október. Rafstöð er risin í Viðlagafjöru og komin í gang. Þar eru tveir rafalar til vara og geta framleitt nægt rafmagn fyrir stöðina. Stærsta  húsið er fóðurstöðin þar sem einnig verður sláturhús að hluta áður en stærra sláturhús rís.

Þar fyrir aftan er hús þar sem jarðsjórinn kemur upp og er hreinsaður áður en hann fer í stóru kerin. Sjór fæst úr 11 holum sem er um 40 metra djúpar og úr einni til tveimur 140 metra djúpum. Sjórinn úr þeim er heitari og er notaður til varmaskipta og viðhalda kjörhita við eldið sem er 11 til tólf gráður  Tryggir góðan vöxt laxins.

Í fjöruborðinu er affallshúsið þar sjórinn rennur til sjávar, en hann er hreinsaður áður. Í hverri átta kerja einingu eru tvö viðhalds og þjónustu hús. Átta ker í ár, átta á næsta ári og svo koll af kolli, í allt sex áfangar með samtals 48 tönkum. Sjórinn sem fer í kerin hefur ekki verið í snertingu við aðrar lífverur er samt hreinsaður áður en hann fer inn á gegnisstreymiskerfi og er svo líka hreinsaður áður enn hann fer í sjóinn.

Laxey stefnir á að framleiða eins mikið vatn fyrir starfsemina og það getur með því að nota RÓ síu sem breytir sjó í vatn. Í seiðastöðinni fer vatnið inn á lokað hringrásarkerfi í seiðaeldisstöðinni og tekur það um tæpan klukkutíma að fara í gegnum kerfið. Gert er ráð fyrir að kerfin séu að endurnýta 99,7% vatnsins í hverju kerfi.

Seiran, úrgangur frá seiðum og laxi í eldi er hreinsuð frá og safnað saman og notuð sem áburður. Í henni er mjög hátt hlutfall af fosfór sem er mjög góður fyrir allan gróður.