Vestmannaeyjabær og Vera lífsgæðasetur stóðu fyrir fyrirlestri um hvernig litlar breytingar í daglegu lífi geta stuðlað að betri heilsu og líðan. Greint er frá viðburðinum á vef Vestmannaeyjabæjar.

Fyrirlesturinn var haldinn í tilefni Evrópskrar íþróttaviku og bar yfirskriftina „Hvað ef eitt lítið skref gæti haft stór áhrif?“ Þar fjölluðu Thelma Rut Grímsdóttir næringarfræðingur og Tinna Tómasdóttir talmeinafræðingur um heilsu og vellíðan.

Þær ræddu meðal annars mikilvægi reglulegrar hreyfingar, fjölbreyttrar og næringarríkrar fæðu, góðs svefns og raunhæfra markmiða. Meginboðskapurinn var að breytingarnar þurfi hvorki að vera stórar né flóknar. Lítil skref sem henta hverjum og einum geti skilað árangri með tímanum.

Fyrirlesturinn var hluti af dagskrá Evrópskrar íþróttaviku, #BeActive.