„Þetta er náttúrulega stærsta svið á Íslandi og þetta er 150 ára stöffið, þannig við hlökkum til að spila á 150 ára stöffinu, sko“ segir Aron Kristinn Jónasson meðlimur raftónlistartvíeykisins ClubDub sem hefur verið að gera góða hluti á íslensku tónlistarsenunni. Tónlistarmaðurinn Brynjar Barkarson myndar hinn helming sveitarinnar. „Það er bara búið að vera nóg að gera, náttúrulega gáfum út „Risa tilkynningu“ og hún trónir enn á toppi íslenska vinsældarlistans, allavega „bad bitch í RVK“ og „Augnablik“ með Bríeti. Það er bara gaman að komast í stúdíó, vinna, gera tónlist, skapa, og við komum til með að halda því áfram svo lengi sem það er gaman.“

ClubDub hafa mætt á hverja einustu Þjóðhátíð sem haldin hefur verið síðan að sveitin fæddist fyrir sex árum síðan. Vinirnir kynntust í Verzlunarskóla Íslands og voru saman í myndbandanefndinni 12:00 þar sem þeir gerðu meðal annars lagið „Aðeins meira en bara vinir“ sem er með ríflega 650 þúsund áhorf á YouTube. ClubDub verður svo til nokkru eftir að strákarnir eru reknir úr skólanum fyrir að svindla á jólaprófunum.

Strákarnir koma fram á stóra sviðinu á sunnudagskvöld og verða að skemmta fyrr um daginn í Nova partýinu. „Við förum örugglega í einhverja göngu og fáum okkur einn kaldan á Lundanum,“ segir Aron um plön helgarinnar.

Myndu bjóða upp á lamb og brennivín

„Þetta væri svona Íslandstjald þar sem væri fullt af íslenskum fánum og það væri spiluð íslensk tónlist á bæði gítar og píanó. Íslenskt brennivín og íslenskt lambakjöt. Það væri kannski hægt að fá einhvern ClubDub varning líka. En ég er að tala um að spila íslensk lög frá til dæmis Flóna, Birni, Herra Hnetusmjör, Bríeti, GDRN, svona nýtískuleg lög á gítar, ekki þessi gömlu, sko“ segir Aron um hvernig stemningin væri í tjaldinu hans og Brynjars ef þeir væru að sjá um hvítt hústjald í ár.

Loks, einhver skilaboð til Dalsins? „Skemmtið ykkur fallega og njótið að vera á fallegustu eyju landsins í góðra vina hópi og muna að drekka nóg af vatni,“ segir Aron Kristinn að endingu.

Úr þjóðhátíðarblaði Eyjafrétta.