Ísfisktogararnir Vestmannaey VE og Bergey VE hafa fiskað afar vel að undanförnu. Aflabrögðin hafa verið slík að þurft hefur að hægja á skipunum þannig að þau hafa legið lengur í höfn en venja er til að loknum löndunum,

Bergey landaði fullfermi í Grindavík á föstudag og var Jón Valgeirsson skipstjóri ánægður með veiðiferðina. „Við vorum að veiðum á Selvogsbankahaus í blíðuveðri og það var sannkölluð afbragðsveiði. Þarna fékkst langmest af ýsu en síðan var dálítið af þorski og ufsa með í aflanum. Veiðin var jöfn og fengust yfirleitt um 10 tonn í holi. Það eru mörg skip í ýsunni á þessum slóðum,” sagði Jón í samtali við vef Síldarvinnslunnar.

Vestmannaey landaði fullfermi í Grindavík á laugardag að afloknum stuttum túr. Birgir Þór Sverrisson skipstjóri sagði að ýsugengdin væri eftirtektarverð

„Þessi túr var stuttur. Við vorum um einn og hálfan sólarhring að veiðum. Það var byrjað á Selvogsbanka og þar fékkst blandaður afli en síðan færðum við okkur á Tána til þess að ná í ýsu. Það var sannkölluð mokveiði og satt að segja vekur ýsugengdin mikla athygli. Það virðist vera mjög gott ástand á ýsunni og hana er að finna í miklu magni á stóru svæði,” sagði Birgir Þór.

Bergey hélt til veiða á ný í gærkvöldi og verður lögð áhersla á karfaveiði að þessu sinni. Vestmannaey mun væntanlega halda til veiða á ný á föstudag.