Framkvæmdir eru hafnar við lagningu göngustígs frá útsýnisskála Sjónarhorns flakkarans, listaverks Ólafs Elíassonar í nýja hrauninu við Eldfell.

Stígurinn er annar áfangi listaverksins en sá fyrsti, útsýnisskálinn, var vígður í maí. Verkið samanstendur af skálanum og göngustíg sem liggur um hraunið og umhverfis Eldfell.

Stígurinn fylgir sömu leið og svonefndur Flakkari fór í Heimaeyjargosinu árið 1973. Flakkarinn var stór hraunfylla sem brotnaði úr Eldfelli og flaut ofan á glóandi hraunstraumnum í átt að innsiglingunni áður en framrás hans var stöðvuð með hraunkælingu.

Vestmannaeyjabær fékk rúmlega 107 milljóna króna styrk úr Framkvæmdasjóði ferðamannastaða til verksins. Um var að ræða hæsta styrk sjóðsins árið 2026 og fjármagnar hann lagningu stígsins að fullu. Markmið framkvæmdarinnar er meðal annars að bæta öryggi gesta og vernda viðkvæmt náttúruumhverfi svæðisins.

Halldór B. Halldórsson fór á vettvang og tók meðfylgjandi myndband af framkvæmdunum.