Í upphafi árs tilkynntu HS Veitur að hafin væri skipulögð lekaleit í Vestmannaeyjum. Biðlað var til bæjarbúa að láta fagaðila yfirfara kerfi sín og að lagfæra mögulegar bilanir og rangtengingar.

Einnig kom fram í tilkynningunni að talsvert af vatni færi út úr kerfinu, vegna leka og rangtenginga, sem olli því að stöðugt þurfti að bæta á það með vatni úr neðansjávarvatnslögninni, sem eins og kunnugt er, er mikið löskuð.

Yfir 200 rúmmetrar töpuðust á sólarhring

Samkvæmt upplýsingum frá HS Veitum voru að tapast – fyrir átaksverkefnið – rúmir 200m³ á sólarhring af vatni úr lokaða hitaveitukerfinu í Vestmannaeyjum.

Sigrún Inga Ævarsdóttir, samskipta og markaðsstjóri HS Veitna segir í samtali við Eyjar.net aðspurð um hvort leitin hafi borið árangur að lekaleit í dreifikerfi hitaveitunnar í Vestmannaeyjum hafi gengið vel og er búið að staðsetja fimm leka víðsvegar um bæinn.

Stofnæð löskuð á gatnamótum Skólavegar og Vestmannabrautar

„Viðgerð er lokið á tveim stöðum og stefnt að áframhaldandi viðgerðum á næstu vikum. Mikilvægt er að undirbúa þessi verk vel og að veðurfar sé ákjósanlegt á meðan á viðgerðum stendur og lokað er fyrir heitt vatn hjá íbúum og fyrirtækjum. Einn af þeim lekum sem gera þarf við er á stofnæð á gatnamótum Skólavegar og Vestmannabrautar. Þar sem um stofnæð er að ræða verður viðgerðin töluvert umfangsmikil og gera má ráð fyrir að hún taki nokkra daga. Íbúar munu því verða varir við framkvæmdina þar sem loka þarf fyrir heitt vatn á nokkuð stóru svæði í miðbænum á meðan á henni stendur. Með góðum undirbúningi og skipulagi verður leitast við að lokun fyrir heita vatnið vari í sem skemmstan tíma þótt framkvæmdin í heild sinni feli í sér mikið rask og taki töluverðan tíma.“ segir hún.

Tímafrekt verkefni

Þá segir Sigrún Inga að starfsfólk HS Veitna í Vestmannaeyjum vinni að leikaleit nær alla daga en gera má ráð fyrir að átaksverkefnið muni standa yfir í þó nokkurn tíma, jafnvel nokkra mánuði, þar sem um tímafrekt verkefni er að ræða og áhersla lögð á að íbúar verði fyrir sem minnstum óþægindum vegna þessa.

„HS Veitur munu halda áfram að leggja áherslu á lekaleit í Vestmanneyjum og bregðast við þeim bilunum sem finnast í tengslum við það átaksverkefni.“

https://eyjar.net/skipulogd-lekaleit-hafin/