Fimmti flokkur drengja ÍBV tók þátt í N1 mótinu á Akureyri dagana 1. – 4. júlí. Mótið í ár var sögulegt í mótssögunni því þetta var í fertugasta sinn sem mótið fór fram. N1 mótið er eitt stærsta knattspyrnumót landsins fyrir 5. flokk drengja en í ár voru 2000 þátttakendur frá 41 félagi víðsvegar um landið sem mynduðu alls 200 lið.

ÍBV sendi fjögur lið til leiks, alls 37 iðkendur, ásamt þjálfurunum Andra Ólafssyni, Guðmundi Tómasi Sigfússyni og Kjartani Frey Stefánssyni.

Á miðvikudeginum var leikin svokölluð forkeppni þar sem liðunum var raðað í deildir út frá árangri. Úrslitin á mótinu voru upp og niður en ÍBV strákarnir stóðu sig vel, skemmtu sér konunglega og komu heim reynslunni ríkari með fullt af minningum.