Krabbamein. Þegar þetta orð er notað fer beygur um fólk, sérstaklega þegar það snertir ástvini.  Í Vestmannaeyjum er starfandi félag sem gefur sig að þeim sem verða fyrir því að fá krabbamein. Krabbavörn hefur það hlutverk að styðja við þá einstaklinga sem greinast með krabbamein í Vestmannaeyjum og aðstandendur þeirra. Í félaginu eru yfir fimm hundruð meðlimir og var aðalfundur félagsins haldinn þriðjudagskvöldið  8. apríl. Þar var farið yfir starf félagsins árið 2024. Félagið nýtur mikillar velvildar og hafa hópar og einstaklingar styrkt það á ýmsan hátt.

Bleikur október og mottu-mars eru fastir liðir,  gamlársdagshlaup, ljósaganga á Eldfell og margt fleira. Félagið hefur séð um að innrétta og útbúa góða aðstöðu á Sjúkrahúsinu fyrir lyfjagjafir og meðferðir. Það er mikill munur fyrir fólk að þurfa ekki að fara upp á land til lyfjagjafa með því umstangi sem því fylgir.

Ætlar að sippa tíu þúsund sipp til styrktar félaginu

Í byrjun fundarins kynnti sr. Viðar Stefánsson framtak sem verður í safnaðarheimili Landakirkju á föstudaginn langa, þar ætlar hann að sippa tíu þúsund sipp til styrktar félaginu. Allir eru velkomnir að  fylgjast með og hvetja kappann. Nánar verður sagt frá þessu framtaki Viðars á næstu dögum hér á síðunni.

Siggu Stínu og Margréti Þóru þökkuð góð störf

Á fundinum var ný stjórn kjörin. Sigurbjörg Kristín Óskarsdóttir hætti sem formaður og Margrét Þóra Guðmundsdóttir hætti sem ritari og voru þeim þökkuð góð störf, en Sigga Stína hefur verið formaður í áratug. Þóranna Margrét Sigurbergsdóttir tekur við sem formaður og Guðrún Gísladóttir tekur við sem ritari. Vera Björk Einarsdóttir verður varamaður í stjórn, en Valgerður Þorsteinsdóttir, Olga Sædís Bjarnadóttir, Kristín Valtýsdóttir og Fjóla Róbertsdóttir verða áfram í stjórn.  Valgerður var og er varaformaður og Olga var og er gjaldkeri Krabbavarnar. Þetta eru allt kraftmiklar konur sem vinna vel saman.

Þriðjudaginn 15. apríl kl. 16.00 ætlar félagið að afhenda Vestmannaeyjabæ bekk og borð á Vigtartorgi og eru allir velkomnir.

Mikilvægt að hlusta og vera til staðar fyrir þá sem þurfa

Þóranna segir í samtali við Eyjafréttir að hún hafi orðið mjög hissa þegar til hennar var leitað um að verða formaður félagsins. Hún segist hafa haft áhuga á starfi félagsins undanfarin ár, eða síðan eiginmaður hennar greindist með krabbamein fyrir rúmum fjórum árum. Þóranna hefur sinnt fólki á margvíslegan hátt, starfað með konum í Aglow, tekið þátt í ,,tólf spora” starfinu í Landakirkju, verið í bæna- og leshópum og tekið þátt í kristilegu starfi til áratuga. Þóranna er leikskólakennari og með diploma gráðu í sálgæslu frá HÍ. Hún hefur sinnt konum sérstaklega bæði hér á landi og í hjálparstarfi í Keníu í Afríku. Hún skrifaði bókina Móðir Missir Máttur ásamt Veru Björk og Oddnýju Garðarsdóttur um það að missa barn óvænt. Þóranna er þakklát fyrir það traust sem henni er sýnt og hlakkar til að takast á við verkefni með Krabbavörn. Þá segir  hún að hún finni, að með vaxandi aldri sé mikilvægt að hlusta og vera til staðar fyrir þá sem þurfa.

Að lokum minnir hún á að Krabbavörn hefur aðstöðu í Arnardrangi og á þriðjudögum kl. 13.00 – 15.00 er opið hús fyrir konur og er þar gott samfélag. „Á miðvikudagskvöldum kl. 19.30 – 21.30 hittast karlar, jafningjafræðsla er mjög mikilvæg.”