Herjólfur fór sína 200. ferð til Þorlákshafnar á árinu í gær, þriðjudag. Þorlákshafnarferðir hafa aldrei verið jafn margar á einu ári síðan Herjólfur IV hóf siglingar milli lands og Eyja.

„Það er kunnara en frá þurfi að segja að fyrri hluti ársins reyndist okkur verulega erfiður,“ segir Ólafur Jóhann Borgþórsson, framkvæmdastjóri Herjólfs. „Frá 15. janúar til 24. maí sigldum við 196 ferðir til Þorlákshafnar og síðan hafa fjórar ferðir bæst við nú í september.“

Til samanburðar sigldi Herjólfur alls 138 ferðir til Þorlákshafnar árið 2025. Ólafur segir þó ástæðu til bjartsýni fyrir síðustu þrjá mánuði ársins. Haustmánuðirnir geti verið góðir og öflugt dýpkunarskip sé nú komið til starfa í Landeyjahöfn.

„Auðvitað vitum við að haustlægðirnar koma og aldan mun rísa, sem getur gert aðstæður við Landeyjahöfn erfiðar. Með öflugri dýpkun og breyttum dýpkunaraðferðum vonumst við hins vegar til þess að frátafir vegna aðstæðna í höfninni verði mun minni en við höfum áður séð,“ segir Ólafur.