Herjólfur sigldi í gærkvöldi sína fyrstu ferð í Landeyjahöfn eftir erfiðan kafla í samgöngum við Eyjar. Óskar Pétur Friðriksson, ljósmyndari Eyjafrétta, var um borð í þessari langþráðu ferð.
Stemningin lét ekki á sér standa þrátt fyrir snjókomu og kulda. Við bryggjuna rakst Óskar á Stjána á Emmunni sem beið í ferðabílnum sínum eftir að komast um borð.
„Hann flautaði á mig þegar hann sá mig mynda Herjólf og bauð mér inn í bílinn að fá mér hrossabjúgu sem hann hafði eldað þar,“ segir Óskar og hlær.
Ekki þurfti að tvísegja það
„Hrossabjúgu með kartöflum og rófum – hvað er hægt að hugsa sér betra? Sérstaklega þegar snjóar úti,“ segir hann. Þrátt fyrir vetrarlegt veður var ferðin ákveðinn vorboði fyrir Eyjamenn.
„Fyrsta ferð Herjólfs er okkar vorboði í snjókomunni,“ segir Óskar Pétur. Myndasyrpu frá ferðinni má sjá hér að neðan.
