Skemmtiferðaskipasumarið í Vestmannaeyjum hófst formlega í dag þegar fyrsta skemmtiferðaskip ársins lagði leið sína til Eyja. Þar með er ákveðinn sumarkafli hafinn í bænum, en næstu mánuðir munu þúsundir gesta streyma til Eyja með skipum hvaðanæva að úr heiminum.

Von er á um 100 skemmtiferðaskipum til Vestmannaeyja í sumar og talið er að farþegar verði rúmlega 50 þúsund talsins. Skemmtiferðaskipakomur hafa á undanförnum árum orðið sífellt stærri þáttur í ferðaþjónustu og atvinnulífi Eyjanna, þar sem áhrifanna gætir víða í bæjarlífinu.

Fyrsta skipakoma ársins markar fyrir marga ákveðin tímamót – þegar sumarið fer að láta á sér kræla af alvöru. Líf færist í höfnina, gestir fylla götur bæjarins og sumarstemmingin tekur að myndast.

Halldór B. Halldórsson tók meðfylgjandi myndband í dag þegar fyrsta skip sumarsins kom til Eyja og fangaði þar vel andrúmsloftið við höfnina á þessum fyrsta stóra degi sumarsins.