Virkni eldgossins á Reykjanesi virðist nokkuð stöðug og áfram eru virk gosop á sömu stöðum og í gær. Hraun rennur frá gígunum í suður ofan á hrauni sem rann á fyrstu dögum gossins. Lítil sem engin hreyfing hefur mælst á hraunjöðrum nærri Suðurstrandarvegi og Svartsengi. Jarðskjálftavirkni síðan eldgosið hófst á laugardagskvöld hefur verið minniháttar. Þetta kemur fram á vef Veðurstofu Íslands.

ÞAr segir jafnframt að veðurspá sé vaxandi suðaustanátt í dag, 13-20 m/s síðdegis. Gasmengun berst til norðvesturs, og gæti hennar orðið vart í Reykjanesbæ, nálægum byggðarlögum og líka í Svartsengi. Lægir í kvöld og þá gæti orðið vart við gasmengunnar nálægt gosstöðvum eins og Svartsengi og Grindavík. Svo snýst í norðlæga átt seint í kvöld og þá berst gasmengun til suðurs til Grindavíkur. Á morgun (fimmtudag) er norðvestan og vestan 8-15 m/s og berst gasmengun til austurs og suðausturs og gæti hennar orðið vart á Suðurlandi eins og í Þorlakshöfn eða í Vestmannaeyjum. Þann 17. mars var útstreymi SO² frá eldgosinu mælt allt að 50 kg/s, en frumniðurstöður nýrri mælinga benda til þess að dregið hafi verulega úr gasútstreyminu síðan þá. Gasdreifingarspá má finna hér.

Spá veðurvaktar um gasdreifingu

Suðaustanátt 13-20 m/s. Gasmengun berst til norðvesturs, og gæti hennar orðið vart í Reykjanesbæ og nálægum byggðarlögum og líka í Svartsengi. Lægir í kvöld og þá gæti vart við gasmengunnar nálægt gosstöðvum eins og Svartsengi og Gríndavík. Svo snýst í norðlæga átt seint í kvöld og þá berst gasmengun til suðurs til Gríndavíkur.
Á morgun (fimmtudag) er norðvestan og vestan 8-15 m/s og berst gasmengun til austurs og suðausturs og gæti hennar orðið vart á Suðurlandi eins og í Þorlákshöfn eða í Vestmannaeyjum.
Spá gerð: 20.03.2024 15:30. Gildir til: 21.03.2024 23:59.