Herjólfur III er aftur kominn á sölu á erlendri sölusíðu, hjá J. Gran & Co. G. Pétur Matthíasson, upplýsingafulltrúi Vegagerðarinnar segir í samtali við Eyjafréttir aðspurður um hvort búið sé að samþykkja af yfirvöldum að selja skipið að svo sé. „Alþingi hefur samþykkt það með heimild í fjárlögum.”

Í einkasölu í þrjá mánuði

G. Pétur segir að heimildin sé til staðar og hefur verið, þ.e.a.s. að selja eða leigja Herjólf III sbr. 6.gr. fjárlaga og nú fjárlagafrumvarps: „7.9 Að selja eða leigja ferjuna Herjólf III.“

Spurður um hvort ferjan sé í einkasölu hjá umræddu fyrirtæki svarar hann því til að Herjólfur III sé í einkasölu í þrjá mánuði hjá aðilum sem Vegagerðin hefur unnið með áður í tengslum við leigu Herjólfs til Færeyja. Inntur eftir svörum um af hverju innlendum skipasölum sé ekki einnig boðið að selja ferjuna svarar G. Pétur að mjög líklega verði það gert að loknum þessum þremur mánuðum.

Ekki seldur nema afleysingar séu tryggar og afleysingaskip til reiðu

Herjólfur III hefur einnig verið til taks ef eitthvað kemur uppá hjá Herjólfi IV eða hann þarf í slipp eða í viðhaldsstopp. Hvað það varðar svara G. Pétur að Herjólfur III verði ekki seldur nema afleysingar séu tryggar og afleysingaskip til reiðu.

„Í þessu ferli er sett fram svokallað „vænt virði“ á Herjólfi III sem er viðmiðunarverð. Skipið verður selt hæstbjóðanda og verður ekki selt nema fyrir það fáist sanngjarnt og hagkvæmt verð.” segir G. Pétur Matthíasson.