– Byrjar 10.00 og verður spilað í Kiwanis, Oddfellow og Bönkernum

Í fyrsta sinn verður haldið Stigamót Íslandsmótsins í snóker í Vestmannaeyjum.  Mótið hefst klukkan 10.00 á morgun, laugardag og verður keppt á þremur stöðum, Kiwanis, Oddfellow og í Bönkernum, sem er í kjallara Hvítasunnukirkjunnar.  Eyjamönnum er velkomið að kíkja við og fylgjast með nokkrum af bestu snókerspilurum landsins etja kappi.

Nokkrir Eyjamenn taka þátt í mótinu en Íslandsmótið í snóker er þannig að haldin eru 9 stigamót yfir vetrartímann og safna leikmenn stigum á stigalista.  Í lok vetrar fer svo fram úrslitakeppni þar sem stigahæstu leikmenn mætast.  Mótið verður klárað á laugardaginn gera má ráð fyrir að undanúrslit hefjist um fimmleytið og úrslitaleikur um kvöldmatarleytið.  Undanúrslit og úrslit fara fram í Bönkernum í kjallara Hvítasunnukirkjunnar.

Fréttatilkynning.